वांजरवाडा रस्‍त्यावर अपघात सत्र अन् मरणयातना, तीन महिन्यात लागली 'वाट'

निलंगा :  निटूर ते शिरोळ-वांजरवाडा या रस्त्याचे जून महिन्यातच डांबरीकरणाचे काम करण्यात आले होते. मात्र, अवघ्या तीन महिन्यातच रस्त्याचे बारा वाजले आहेत. जागोजागी खड्डे पडले असून डांबर निघाले आहे. त्यामुळे अवघ्या तीन महिन्यातच या रस्त्याचे तिनतेरा झाले आहे. ठेकेदाराकडून केलेल्या कामाच्या गुणवत्तेवर यामुळे प्रश्नचिन्ह निर्माण झाला आहे. 

औरंगाबाद जिल्ह्यातील महत्त्वाच्या बातम्या वाचण्यासाठी येथे क्लिक करा.

तालुक्यातील निटूर, डांगेवाडी, कलांडी, शिरोळ-वांजरवाडा या रस्त्याचे काम सार्वजनिक बांधकाम विभाग निलंगा कडून जून महिन्यामध्ये करण्यात आले होते. या रस्त्यावर यापूर्वी अनेक वेळा विविध योजनेतून कामे झाले असतानाही रस्त्याचे बीबीएम व कार्पेटचे काम पावसाळा सुरू होण्यापूर्वी संबंधित ठेकेदाराकडून करण्यात आले. निटूर मोडपासून शिरोळ वांजरवाडा पर्यंत या रस्त्याचे काम करण्यात आले होते. परंतु अवघ्या तीन महिन्यात रस्त्यावरील डांबर निघून गेले आहे. ठिकठिकाणी मोठमोठे खड्डे पडले आहेत. रस्ता दबून गेला आहे. 

मराठवाड्यातील अन्य बातम्या वाचण्यासाठी यावर क्लिक करा..!

मोठमोठे खड्डे पडल्यामुळे वाहनधारक व प्रवाशांना पूर्वीच्या अनुभवांना सामोरे जावे लागत आहे. रस्त्यावरील डांबर व खडी पूर्णता उघडून गेली असून निकृष्ट कामामुळे अवघ्या तीन महिन्यातच रस्ता खराब झाला आहे. याकडे संबंधित विभागाच्या अधिकाऱ्यांनी लक्ष देऊन पुन्हा रस्ता दुरुस्ती करावी अशी मागणी या भागातील नागरिकांकडून केली जात आहे. सार्वजनिक बांधकाम विभागाने लाखो रुपयाचा निधी या रस्त्यासाठी खर्च केला आहे. परंतु हा रस्ता तीन महिने देखील तग धरु शकला नाही. त्यामुळे शासनाचा पैशाचा उपयोग व्यर्थ झाला असे म्हणण्याची वेळ आली. संबंधित ठेकेदाराकडून या रस्त्याची पूर्ण दुरुस्ती करून घ्यावी अशी मागणी करण्यात येत आहे.

(संपादन-प्रताप अवचार)

Source From : esakal